M. Tullius Cicero Pro Cn. Plancio 26

[26] etenim si ante reditum meum Cn. Plancio se volgo viri boni, cum hic tribunatum peteret, ultro offerebant, cui nomen meum absentis ¹ honori fuisset, ei meas praesentis ² preces non putas profuisse? an Minturnenses coloni, quod C. Marium e ³ civili ferro ⁴ atque ex impiis manibus eripuerunt, quod tecto receperunt, quod fessum inedia fluctibusque ⁵ recrearunt, quod viaticum congesserunt, quod navigium dederunt, quod eum linquentem terram eam quam servarat ⁶ votis, ominibus lacrimisque ⁷ prosecuti sunt, aeterna in laude versantur; Plancio, quod me vel vi pulsum ⁸ vel ratione cedentem receperit, iuverit, custodierit, his et senatui populoque Romano, ut haberent quem ⁹ reducerent, conservarit, honori hanc fidem, misericordiam, virtutem fuisse miraris?