Probus 20

1 Quibus peractis bellum Persicum parans, cum per Illyricum iter faceret, a militibus suis per insidias 2 interemptus est. causae occidendi eius haec fuerunt: primum quod numquam militem otiosum esse perpessus est, si quidem multa opera militari manu perfecit, dicens annonam gratuitam militem comedere 3 non debere, his addidit dictum eis grave, si umquam eveniat, salutare rei publicae, brevi milites necessarios 4 non futuros, quid ille conceperat animo qui hoc ¹ dicebat? nonne omnes barbaras gentes subegerat ² pedibus totumque ³ mundum fecerat iam Romanum? 5 Brevi, " inquit, " milites necessarios non habebimus. quid est aliud dicere : Romanus iam miles erit nullus? ubique regnabit, omnia possidebit ⁴ secura res publica. 6 orbis terrarum non arma fabricabitur, non annonam praebebit, boves ⁵ habebuntur aratro, equus nascetur ad pacem, nulla erunt bella, nulla captivitas, ubique pax, ubique Romanae leges, ubique iudices nostri.