M. Tullius Cicero Pro Rege Deiotaro 15

[15] is igitur non modo a te periculo liberatus sed etiam honore amplissimo ornatus, arguitur domi te ¹ suae interficere voluisse: quod tu, nisi eum furiosissimum iudicas ² , suspicari profecto ³ non potes. ut enim omittam cuius tanti sceleris fuerit in conspectu deorum penatium necare hospitem, cuius tantae importunitatis omnium gentium atque omnis memoriae clarissimum lumen exstinguere, cuius ⁴ ferocitatis victorem orbis terrae ⁵ non extimescere, cuius tam inhumani et ingrati animi ⁶ , a quo rex appellatus esset, in eo tyrannum inveniri—ut haec omittam, cuius tanti furoris fuit omnis reges, quorum multi erant finitimi, omnis liberos populos ⁷ , omnis socios, omnis provincias, omnia denique omnium arma contra se unum excitare? quonam ⁸ ille modo cum regno, cum domo ⁹ , cum coniuge, cum carissimo ¹⁰ filio distractus esset, tanto scelere non modo perfecto sed etiam cogitato?