M. Tullius Cicero Pro Cn. Plancio 77

[77] tu autem, Laterensis, qui tum lacrimas meas gratas esse dicebas, nunc easdem vis invidiosas videri.

32 negas tribunatum Planci quicquam attulisse adiumenti dignitati meae, atque hoc loco, quod verissime facere potes, L. Racili, fortissimi et constantissimi viri, divina in me merita commemoras. cui ¹ quidem ego, sicut Cn. Plancio ² , numquam dissimulavi me plurimum debere semperque prae me feram ³ ; nullas enim sibi ille neque contentiones neque inimicitias neque vitae dimicationes nec pro re publica nec pro me defugiendas putavit. atque utinam quam ego sum in illum gratus, tam licuisset per hominum vim et iniuriam populo Romano ⁴ ei ⁵ gratiam referre ⁶ ! sed si non eadem contendit in tribunatu Plancius, existimare debes non huic voluntatem defuisse sed me, cum tantum ⁷ iam Plancio deberem, Racili ⁸ beneficiis fuisse contentum.