M. Tullius Cicero Pro M. Caelio 55

[55] sed cur diutius vos, iudices, teneo? ipsius iurati religionem auctoritatemque percipite atque ¹ omnia diligenter testimoni verba cognoscite. recita. quid exspectatis amplius? an aliquam ³ vocem putatis ipsam pro ⁴ se causam et veritatem posse ⁵ mittere? haec est innocentiae defensio, haec ipsius causae oratio, haec una ⁶ vox veritatis. in crimine ipso nulla suspicio est, in re nihil est argumenti, in negotio quod actum esse dicitur nullum vestigium sermonis, loci, temporis; nemo testis, nemo conscius nominatur, totum crimen profertur ex inimica, ex infami, ex crudeli, ex facinerosa, ex libidinosa domo. domus autem illa quae temptata esse ⁷ scelere isto nefario dicitur plena est integritatis, dignitatis ⁸ , offici, religionis; ex qua domo recitatur vobis iure iurando devincta auctoritas, ut res minime dubitanda in contentione ponatur, utrum temeraria, procax, irata mulier finxisse crimen, an gravis sapiens moderatusque vir religiose testimonium dixisse videatur.