Praefatio
Surgeret in thalamum ducto cum Pelion areu
1
nec caperet tantos hospita terra deos,
cum socer aequoreus numerosaque turba sororum
certarent epulis continuare dies
praeberetque Iovi communia pocula Chiron,
5
molliter obliqua parte refusus equi,
Peneus gelidos mutaret nectare fontes,
Oetacis fluerent spumea vina iugis:
Terpsichore facilem lascivo pollice movit
barbiton et molles duxit in antra choros.
10
carmina nec superis nec displicuere Tonanti,
cum teneris nossent congrua vota modis.
Centauri Faunique negant. quae flectere Rhoeton,
quae rigidum poterant plectra movero Pholum?
Septima lux aderat caelo totiensque renato
15
viderat exactos Hesperus igne choros:
tum Phoebus, quo saxa domat, quo pertrahit ornos,
pectine temptavit nobiliore lyram
venturumque sacris fidibus iam spondet Achillem,
iam Phrygias caedes, iam Simoenta canit.
20
frondoso strepuit felix Hymenaeus Olympo;
reginam resonant Othrys et Ossa Thetim.
Epithalamium de nuptiis Honorii Augusti. Claudian. ed. Maurice Platnauer. Cambridge, MA; London, England. 1922.
Sponsored by Perseus Project, Tufts University.
Funding provided by The Mellon Foundation.