Ausonius, Decimus Magnus, Commemoratio Professorum Burdigalensium, ed. Hugh G. Evelyn-White, 24

DOCTRINAE vitaeque pari brevitate caducum,

1

Glabrio, te maestis commemorabo elegis,

stemmate nobilium deductum nomen avorum,

Glabrio Acilini, 1 Dardana progenies.

tu quondam puero conpar mihi, discipulus mox,

5

meque dehinc facto rhetore grammaticus,

inque foro tutela reis et cultor in agris,

digne, diu partis qui fruerere bonis:

commode, laete, benigne, abstemie, tam bone dandis

semper consiliis, quam taciturne datis,

10

tam decus omne tuis quam mox dolor, omnia acerbo

funere praereptus, Glabrio, destituis:

uxore et natis, genitore et matre relictis,

eheu quam multis perdite nominibus!

flete diu nobis, numquam satis, accipe acerbum,

15

Glabrio, in aeternum commemorate, vale.

Ausonius, Decimus Magnus Commemoratio Professorum Burdigalensium 24