Consulatum gessit cum
LucioL. Valerio Flacco. sorte provinciam nactus Hispaniam citeriorem ex ea triumphum deportavit.
ibi cum diutius moraretur,
PubliusP. Scipio Africanus consul iterum, cuius in priore consulatu quaestor fuerat, voluit eum de provincia depellere et ipse ei succedere, neque hoc per senatum efficere potuit, cum quidem Scipio principatum in civitate obtineret, quod tum non potentia, sed iure res publica administrabatur. qua ex re iratus senatui consulatu peractoc privatus in urbe mansit.
at Cato, censor cum eodem Flacco factus, severe praefuit ei potestati. nam et in complures nobiles animadvertit et multas res novas in edictum addidit, qua re luxuria reprimeretur, quae iam tum incipiebat pullulare.
circiter annos octoginta, usque ad extremam aetatem ab adulescentia, rei publicae causa suscipere inimicitias non destitit. a multis tentatus non modo nullum detrimentum existimationis fecit, sed, quoad vixit, virtutum laude crevit.
Cato. Cornelius Nepos. ed. Albert Fleckeisen, ed. Karl Halm. Leipzig. 1886.
Sponsored by Perseus Project, Tufts University.
Funding provided by Tufts University.