M. Tullius Cicero Philippicae 104

[104] quis vero audivit umquam—nullius autem salus curae pluribus fuit— de fortunis Varronis rem ullam esse detractam? quid? si ¹ etiam scripsit ad te Caesar ut redderes, quid satis potest dici de tanta impudentia? Remove gladios parumper illos quos videmus: iam intelleges aliam causam esse hastae Caesaris, aliam confidentiae et temeritatis tuae. non enim te dominus modo illis sedibus ² sed quivis amicus, vicinus ³ , hospes, procurator arcebit. 41 at quam multos dies in ea villa turpissime es ⁴ perbacchatus! ab hora tertia bibebatur, ludebatur, vomebatur. O tecta ipsa misera, quam dispari domino—quamquam quo modo iste dominus—sed tamen quam ab ⁵ dispari tenebantur! studiorum enim suorum M. ⁶ Varro voluit illud ⁷ , non libidinum deversorium.