M. Tullius Cicero Pro Rege Deiotaro 12

[12] ignosce, ignosce, Caesar, si eius viri auctoritati rex Deiotarus cessit quem ¹ nos omnes secuti sumus; ad quem cum di atque homines omnia ornamenta congessissent, tum tu ipse plurima et maxima. nec enim ² , si tuae res gestae ceterorum laudibus obscuritatem attulerunt, idcirco Cn. Pompei memoriam amisimus. quantum nomen illius ³ fuerit, quantae opes, quanta in omni genere bellorum gloria, quanti honores populi Romani, quanti senatus, quanti tui, quis ignorat? tanto ⁴ ille superiores vicerat gloria quanto tu omnibus ⁵ praestitisti. itaque Cn. Pompei bella, victorias, triumphos, consulatus admirantes numerabamus: tuos enumerare non possumus.