M. Tullius Cicero Pro Cn. Plancio 48

[48] sic enim tecum ago. quam tibi commodum est ¹ , unam tribum ² delige; tu doce ³ , id quod debes, per quem sequestrem, quo divisore corrupta sit; ego, si id facere non potueris quod, ut opinio mea fert, ne incipies quidem, per quem ⁴ tulerit docebo. estne haec vera contentio? placetne sic agi? num ⁵ possum magis pedem conferre, ut aiunt, aut propius accedere? quid taces, quid dissimulas, quid tergiversaris? etiam atque etiam insto atque urgeo, insector ⁶ , posco atque adeo flagito crimen. quamcumque tribum, inquam, delegeris quam tulerit Plancius, tu ostendito, si poteris ⁷ , vitium; ego qua ratione tulerit docebo. neque ⁸ erit haec alia ratio Plancio ac tibi ⁹ , Laterensis ¹⁰ . nam ut quas tribus tu tulisti, si iam ¹¹ ex te requiram, possis quorum studio tuleris explicare, sic ego hoc contendo, me tibi ipsi adversario cuiuscumque ¹² tribus rationem poposceris redditurum.