M. Tullius Cicero Pro L. Cornelio Balbo 43

[43] etenim quis est tam demens quin sentiat ius hoc Gaditanis esse retinendum, ne saeptum sit iis iter in perpetuum ¹ ad hoc amplissimum praemium civitatis, et magno opere iis esse laetandum huius L. Corneli benivolentiam erga suos remanere Gadibus, gratiam et facultatem commendandi in hac civitate versari? quis est enim nostrum cui non illa civitas sit huius studio, cura, diligentia commendatior? 19 omitto quantis ornamentis populum istum C. Caesar, cum esset in Hispania praetor, adfecerit, controversias ² sedarit, iura ipsorum permissu statuerit, inveteratam quandam ³ barbariam ex Gaditanorum moribus disciplinaque delerit, summa in eam civitatem huius rogatu studia et beneficia contulerit. multa praetereo quae cotidie ⁴ labore huius et studio aut omnino aut certe facilius consequantur. itaque et adsunt principes civitatis ⁵ et defendunt amore ut suum civem, testimonio ut nostrum, officio ut ex nobilissimo civi sanctissimum hospitem, studio ut diligentissimum defensorem commodorum suorum.