M. Tullius Cicero Pro L. Cornelio Balbo 11

[11] 5 audivi hoc de parente meo puer, cum Q. Metellus Luci filius causam de pecuniis repetundis ¹ diceret, ille, ille ² vir ³ , cui patriae salus dulcior quam conspectus fuit, qui de civitate decedere quam de sententia maluit—hoc igitur causam dicente, cum ipsius tabulae circumferrentur inspiciendi nominis causa, fuisse iudicem ex illis equitibus Romanis gravissimis viris neminem quin ⁴ removeret oculos et ⁵ se totum averteret, ne forte, quod ille in tabulas publicas rettulisset, dubitasse quisquam verumne an falsum esset videretur: nos Cn. Pompei decretum, iudices ⁶ , de consili sententia pronuntiatum recognoscemus, cum legibus conferemus, cum foederibus, omnia acerbissima diligentia perpendemus ⁷ ?