M. Tullius Cicero Pro L. Cornelio Balbo 1

[1] 1 si auctoritates patronorum in iudiciis valent ¹ , ab amplissimis ² viris ³ L. Corneli causa defensa est; si usus, a peritissimis; si ingenia, ab eloquentissimis; si studia, ab amicissimis et cum beneficiis cum L. Cornelio tum maxima ⁴ familiaritate coniunctis. quae sunt igitur meae partes? auctoritatis tantae quantam vos in me esse voluistis, usus mediocris, ingeni minime voluntati paris ⁵ . nam ceteris a quibus est defensus hunc debere plurimum video; ego quantum ei debeam, alio loco; principio orationis hoc pono ⁶ , me omnibus qui amici fuerint saluti et dignitati meae, si minus referenda ⁷ gratia satis facere potuerim, praedicanda et habenda certe satis esse facturum.