M. Tullius Cicero De Provinciis Consularibus 36

[36] 15 nam illae sententiae virorum clarissimorum minime probandae sunt, quorum alter ulteriorem Galliam decernit cum Syria, alter citeriorem. qui ulteriorem, omnia illa de quibus disserui paulo ante perturbat; simul ostendit eam se tenere ¹ legem quam ² esse legem neget, et, quae pars provinciae sit cui non possit intercedi, hanc ³ se avellere, quae defensorem habeat, non tangere; simul et illud facit, ut, quod illi a populo datum sit, id non violet, quod senatus dederit, id senator properet auferre. alter belli Gallici rationem habet ⁴ , fungitur officio boni senatoris, legem quam non putat, eam quoque servat; praefinit enim successori diem. quamquam ⁵ mihi nihil videtur alienius ⁶ a dignitate disciplinaque maiorum quam ut, qui consul Kalendis Ianuariis habere provinciam debet, is ut eam desponsam non decretam habere videatur.