M. Tullius Cicero De Provinciis Consularibus 15

[15] 7 hosce igitur imperatores habebimus? quorum alter non audet nos certiores facere qua re ¹ imperator appelletur, alterum, si tabellarii non cessarint, necesse est paucis diebus paeniteat audere: cuius amici si qui sunt, aut si beluae tam immani tamque taetrae possunt ulli esse amici, hac consolatione utuntur, etiam T. Albucio supplicationem hunc ordinem denegasse. quod est ² primum dissimile, res in Sardinia cum mastrucatis latrunculis a propraetore ³ una cohorte auxiliaria gesta, et ⁴ bellum cum maximis Syriae gentibus et tyrannis consulari exercitu imperioque confectum. deinde Albucius, quod a senatu petebat, ipse sibi in Sardinia ante decreverat; constabat enim Graecum hominem ac levem in ipsa provincia quasi triumphasse, itaque hanc eius temeritatem senatus supplicatione denegata notavit.