M. Tullius Cicero Pro M. Caelio 33

[33] 14 sed tamen ex ipsa quaeram prius utrum me secum severe et graviter et prisce agere malit, an remisse et leniter et urbane. si ¹ illo austero more ac modo, aliquis mihi ab inferis excitandus est ex barbatis illis, non hac barbula ² qua ista delectatur sed illa ³ horrida quam in statuis antiquis atque imaginibus videmus, qui obiurget mulierem et qui ⁴ pro me loquatur ne mihi ista forte suscenseat. exsistat igitur ex hac ipsa familia aliquis ac potissimum Caecus ille; minimum enim dolorem capiet qui istam non videbit. qui profecto, si exstiterit, sic aget ac sic loquetur: mulier, quid tibi cum Caelio, quid cum homine adulescentulo, quid cum alieno? cur aut tam familiaris ⁵ fuisti ut aurum commodares ⁶ , aut tam inimica ut venenum timeres? non patrem tuum videras, non patruum, non avum, non proavum ⁷ , non abavum, non atavum ⁸ audieras consules fuisse;