M. Tullius Cicero Pro M. Caelio 29

[29] sed tu mihi videbare ex communi infamia iuventutis aliquam invidiam Caelio velle conflare. itaque omne illud silentium quod est orationi tributum tuae fuit ob eam causam quod uno reo proposito de multorum vitiis cogitabamus. facile est accusare luxuriem. dies iam me deficiat ¹ , si quae dici in eam sententiam possunt ² coner ³ expromere; de corruptelis, de adulteriis, de protervitate, de sumptibus immensa oratio est. Vt tibi reum neminem sed vitia ista ⁴ proponas, res tamen ipsa et copiose ⁵ et graviter accusari potest. sed vestrae sapientiae, iudices, est ⁶ non abduci ab reo nec, quos aculeos habeat ⁷ severitas gravitasque vestra, cum eos accusator erexerit in rem, in vitia, in mores, in tempora, emittere in hominem et in reum, cum is non suo crimine sed multorum vitio sit in quoddam odium iniustum vocatus.