M. Tullius Cicero Against Vatinius 24

[24] 10 fuerisne tanta crudelitate ut delectos viros et ¹ principes civitatis tollere et ² delere tua rogatione conareris ³ , cum L. Vettium, qui in senatu confessus esset se cum telo fuisse, mortem ⁴ Cn. Pompeio, summo et clarissimo civi, suis manibus offerre voluisse, in contionem produxeris, indicem in rostris, in illo, inquam, augurato templo ac loco conlocaris, quo auctoritatis exquirendae causa ceteri tribuni plebis principes civitatis producere consuerunt? ibi tu indicem Vettium linguam et vocem suam sceleri et dementiae ⁵ tuae praebere voluisti. dixeritne ⁶ L. Vettius in contione tua rogatus a te sese auctores et impulsores et socios habuisse sceleris illius eos viros, quibus e civitate sublatis, quod tu eo tempore moliebare, civitas stare non posset? M. Bibulum, cuius inclusione contentus non eras, interficere volueras, spoliaras ⁷ consulatu, patria privare cupiebas; L. Lucullum, cuius tu rebus gestis, quod ipse ad imperatorias laudes a puero videlicet spectaras, vehementius invidebas, C. Curionem, perpetuum hostem improborum omnium, auctorem publici consili in ⁸ libertate communi tuenda maxime liberum, cum filio principe iuventutis cum re publica coniunctiore etiam quam ⁹ ab illa aetate postulandum fuit, delere voluisti;