M. Tullius Cicero Pro P. Sestio 93

[93] 43 O di immortales! quemnam ostenditis exitum nobis? quam spem rei publicae datis? quotus quisque invenietur tanta virtute vir qui optimam quamque causam rei publicae amplectatur, qui bonis viris deserviat, qui solidam laudem veramque quaerat? cum sciat duo illa rei publicae ¹ paene fata, Gabinium et Pisonem ² , alterum haurire cotidie ex pacatissimis ³ atque opulentissimis Syriae gazis innumerabile pondus auri, bellum inferre quiescentibus ⁴ , ut eorum veteres inlibatasque divitias in profundissimum libidinum suarum gurgitem profundat, villam aedificare in oculis omnium tantam tugurium ut iam videatur esse illa villa quam ipse tribunus plebis pictam olim in contionibus explicabat, quo fortissimum ac summum civem in invidiam homo castus ac non cupidus vocaret;