M. Tullius Cicero Pro P. Sestio 78

[78] an veri simile est ut civis Romanus aut homo liber quisquam cum gladio in forum descenderit ante lucem, ne de me ferri pateretur, praeter eos qui ab illo pestifero ac perdito civi iam pridem rei publicae sanguine saginantur? hic iam de ipso accusatore quaero, qui P. Sestium queritur cum multitudine in tribunatu et cum praesidio magno fuisse, num illo die fuerit? certe ¹ non fuit. Victa igitur est causa rei publicae, et victa non auspiciis, non intercessione, non suffragiis, sed vi, manu, ferro. nam si obnuntiasset Fabricio ² is praetor ³ qui se servasse de caelo dixerat ⁴ , accepisset res publica plagam, sed eam quam acceptam gemere ⁵ posset; si intercessisset conlega Fabricio, laesisset rem publicam, sed tribunicio ⁶ iure laesisset. gladiatores tu novicios, pro exspectata aedilitate suppositos, cum sicariis e carcere emissis ante lucem inmittas ⁷ ? magistratus templo deicias, caedem maximam facias, forum purges ⁸ ? et cum omnia vi et armis egeris, accuses eum qui se praesidio munierit, non ut te oppugnaret, sed ut vitam suam posset defendere?