M. Tullius Cicero Pro P. Sestio 72

[72] ineunt magistratum tribuni plebis, qui omnes se de me promulgaturos confirmarant. ex iis ¹ princeps emitur ab inimicis meis is quem homines in luctu inridentes Gracchum ² vocabant, quoniam id etiam fatum civitatis fuit ut illa ex vepreculis extracta nitedula ³ rem publicam conaretur adrodere. alter vero, non ille Serranus ab aratro, sed ex deserta Gavi Oleli ⁴ area calatis Gaviis in Calatinos Atilios insitus, subito, nominibus in tabulas relatis, nomen suum de tabula sustulit. veniunt Kalendae Ianuariae. vos haec melius scire potestis, equidem audita dico: quae tum frequentia senatus, quae exspectatio populi, qui concursus legatorum ex Italia cuncta, quae virtus, actio, gravitas P. Lentuli consulis fuerit, quae etiam conlegae eius moderatio de me. qui cum inimicitias sibi mecum ex rei publicae dissensione susceptas esse dixisset, eas se patribus conscriptis dixit et temporibus rei publicae permissurum.