M. Tullius Cicero De Domo Sua Ad Pontifices 50

[50] de hac igitur lege dicimus, quasi ¹ iure rogata videatur, cuius quam quisque partem tetigit digito voce praeda ² suffragio, quocumque venit, repudiatus convictusque discessit?

quid si iis verbis scripta est ista proscriptio ut se ipsa dissolvat? est enim: si igitur rettulit falsum senatus consultum, tum est rogatio: si non rettulit, nulla est ³ . satisne tibi videtur a senatu iudicatum me non modo non ementitum esse auctoritatem eius ordinis, sed etiam unum post urbem conditam diligentissime senatui paruisse? quot modis doceo legem istam, quam vocas, non esse legem? quid? si etiam pluribus de rebus uno sortitore tulisti ⁴ , tamenne arbitraris id quod M. Drusus in legibus suis ⁵ plerisque, perbonus ⁶ ille vir, M. Scauro et L. Crasso consiliariis ⁷ non obtinuerit, id te posse, omnium facinorum et stuprorum hominem ⁸ , decumis et Clodiis auctoribus obtinere?