M. Tullius Cicero De Domo Sua Ad Pontifices 132

[132] atque ille tamen ad conlegium rettulit, tu ad quem rettulisti? si quid deliberares, si quid tibi aut piandum aut instituendum fuisset religione domestica, tamen instituto ceterorum ¹ vetere ² ad pontificem detulisses: novum delubrum cum in urbis clarissimo loco nefando quodam atque inaudito ³ instituto inchoares, referendum ad sacerdotes publicos non putasti? at si conlegium pontificum adhibendum non videbatur, nemone horum tibi idoneus visus est, qui aetate honore auctoritate antecellunt, cum quo ⁴ de dedicatione ⁵ communicares? quorum quidem tu non contempsisti sed pertimuisti dignitatem. 52 an tu auderes quaerere ex P. Servilio aut ex M. Lucullo, quorum ego consilio atque auctoritate rem publicam consul ex vestris manibus ac faucibus ⁶ eripui, quibusnam verbis aut quo ritu— primum hoc dico—civis domum consecrares, deinde civis eius cui princeps senatus, tum autem ordines omnes, deinde Italia tota, post cunctae gentes testimonium huius urbis atque imperi conservati dedissent?