PHARNACE superato, Africa recepta, qui ex his proeliis eum adulescente Cn. Pompeio profugissent, cum . . . et ulterioris Hispaniae potitus esset, dum Caesar muneribus dandis in Italia detinetur. . . . quo facilius praesidia contra compararet, Pompeius in fidem uniuscuiusque civitatis confugere coepit. Ita partim precibus partim vi bene magna comparata manu provinciam vastare. Quibus in rebus non nullae civitates sua sponte auxilia mittebant, item non nullae portas contra eludebant. Ex quibus si qua oppida vi ceperat, cum aliquis ex ea civitate optime de Cn. Pompeio meritus civis esset, propter pecuniae magnitudinem alia qua ei inferebatur causa, ut eo de medio sublato ex eius pecunia latronum largitio fieret. Ita paucis commoda ab hoste orta: eo maiores augebantur copiae. Hoc crebrius nuntiis in Italium missis civitates contrariae Pompeio auxilia sibi depostulabant.
De Bello Hispaniensi. Pseudo-Caesar. ed. A. G. Way. London. 1955.
Sponsored by Perseus Project, Tufts University.
Funding provided by Tufts University.