Lucian of Samosata De Syria dea 17

[17] So seyn thei of the foundours of the holy place. And now I schalle speke of the temple, wher that it was sett and who that leet bylden it. Men seyn, the temple that stont now is not that oon the whiche was bylded atte firste, but that was beten doun sithen som tyme, and the temple that stont now is the werk of Stratonice, wyf to the Kyng of Assurye. ¹

I trowe, this is thilke Stratonice that hir step sone lovede, that was betraysed by the phisicyens ² invencioun, For whan the infortune oppressed him, he mighte not susteyne the mysese that semede him schamful, and so he stille (quietly) felle into syknesse, and lay withouten ony peyne; and his hewe chaunged outerly, and his bodye feblede eech day. But whan the phisicyen saughe that he was wayk withouten pleyne cause, he iugged that the syknesse was love. For of derne (secret) love ther ben manye signes, as waike eyen, voyce, hewe, teeres. And whan that he perceyved it, he did thus. With his righte honde he kepte the yonge mannes herte, and thanne he sent after all tho that weren in the house. And whan everyche of the othere entrede, this was in gret ese, but whan his step moder cam, he chaunged his hewe and swatte and schoke and his herte stirte (leaped). Thise thinges scheweden his love to, the phisicyen, that helede him thus.